Э. Буквич: «Тоҷикистон бо захираҳои обиаш кишвари сарсабз аст»

Душанбе, 19.11.2014. (АМИТ «Ховар», Бекназари Абӯбакр). — «Бароям шарафи бузург аст, ки дар ин кишвари зебоманзар қарор дорам,-чунин гуфт сафири тозатаъйини Босния ва Герсеговина Эдиб Буквич 18 ноябр пас аз супоридани эътимоднома ба Президенти Тоҷикистон Эмомалӣ Раҳмон.Сафир зикр намуд, ки миёни Тоҷикистону Босния ва Герсеговина иқтидорҳои ҳамкорӣ хеле зиёданд. Ҳарду давлат тӯли 20-25 соли охир таърихи қариб якхела доштанд. Мо низ мисли кишвари Шумо аз марҳилаи душвори пурпечутоб гузаштем. Имрӯз мо метавонем дар арсаҳои мухталиф ҳамкориҳои муассир дошта бошем. Тавре ки Президенти Тоҷикистон зикр намуд, дар соҳаи энергетика иқтидори бузурги ҳамкориҳо мавҷуд аст ва ширкатҳои Босния ва Герсеговина дар соҳаи гидроэнергетика таҷрибаи ғанӣ доранд. «Ман мутмаинам, ки ширкатҳои Босния ва Герсеговина метавонанд дар тендерҳои лоиҳаҳои бузурги байналмилалӣ, ки дар Тоҷикистон эълон мегарданд, ширкат варзанд. Тоҷикистону Босния ва Герсеговина бо захираҳои бойи обию энергетикӣ кишварҳои сарсабз ва хурраманд ва мо метавонем дар ин самт табодули таҷриба намоем», — гуфт дар анҷоми суҳбат Эдиб Буквич.