Гармидиҳии камхарҷ ба мактабҳои ВМКБ

Хоруғ 20.11.2014. (АМИТ «Ховар», Файз Мирасан).- Ширкати «Помирэнерҷӣ» дар ҳамкорӣ бо мақомоти маҳаллии ҳокимияти давлатии ВМКБ ва Сафоратхонаи шоҳигарии Норвегия дар  Ҷумҳурии Тоҷикистон  ба мақсади сарфаи ҳарчи бештари неруи барқ ва нигаҳдории ҳарорати муътадил дар синфхонаҳо ба мактаби рақами 7-уми шаҳри Хоруғ гармкунакҳои нави барқӣ кумак намуд.  Ин  гармкунакҳои барқиро аз кишвари Олмон интиқол додаанд ва як тан аз мутахассисони ширкати мазкур бо мақсади омӯзиши шеваи кори ин гармкунакҳо ба ин кишвар фиристода шуд. Арзиши гармкунакҳои  барқӣ 800 доллари амрикоӣ  буда, бартариашон аз гармкунакҳои оддӣ дар он аст, ки баъди чанд соати кор хомӯш гардида, боз муддати 6-7 соат аз худ гармӣ ихроҷ мекунанд.  Мутахассисони ширкат баён доштанд, ки мо кӯшиш мекунем сокинони шаҳрро дар 24 соат бо барқ таъмин кунем, аммо агар тасодуфан он қатъ гардад, ин гармкунакҳо то барқарор кардани  барқ синфхонаҳоро гарм нигоҳ медоранд. Ҳамчунин ба воситаи онҳо қариб 50 фоиз  камтар неруи барқ харҷ мешавад.