«Гулшан» ҷашнашро таҷлил мекунад
Душанбе, 27.11.2014. (АМИТ «Ховар», Екатерина Пасторова).- Замоне дастаи ҳунарии «Гулшан» на фақат дар Иттиҳоди Шӯравӣ, балки дар саросари ҷаҳон овозадор буд. Оҳангҳои халқии «Дилбари ҷон», «Сокина», «Чеҳраи зебо», «Гулумой», «Чакра чакидан гирад» ва «Эй санам» то ҳол дар байни мардум шӯҳратёранд. Имрӯзҳо дастаи мазкур ба таҷлили 50 – солагии худ омодагӣ мегирад. Иштироки аъзои ҳукумат ва зиёиёни эҷодкор дар маросимҳои тантанавӣ бахшида ба солгарди ин дастаи ҳунарӣ, ки охири ҳафтаи ҷорӣ дар шаҳри Душанбе баргузор мешаванд, дар назар аст. Дар Театри ҷавонони ба номи Маҳмудҷон Воҳидов маҷлиси ботантана баргузор мегардад. Тавре ки роҳбари Иттиҳодияи гурӯҳҳои консертӣ Абдурасул Ҳалимов зикр намуд, дар ҳошияи таҷлили ин солгард барномаи консертии «Тавлиди дигар» дар толори Филармонияи давлатии Тоҷикистон ба номи Акашариф Ҷӯраев намоиш дода мешавад.Дар консерт ҳунарпешагони ҷавон Бахтиёр Иброҳимов, Суруш Холов, Фаридаи Бахтиёр, Зафар Абдуалимов, Сорбон Раҷабов ва дигарон ҳунарнамоӣ мекунанд.Ёдовар мешавем, ки аввалин дастаи эстрадии «Гулшан» — и Ҷумҳурии Тоҷикистон бо қарори Шӯрои вазирони ИҶШС моҳи майи соли 1964 дар назди Кумитаи давлатии радиошунавонӣ ва телевизиони Тоҷикистон таъсис ёфта буд.