Хидматрасонии пулакӣ ба аҳолӣ баробари 2 фоиз афзуд
Душанбе, 28.11.2014. (АМИТ «Ховар», Покизаи Шодмон).- Ҳаҷми хидматрасонии пулакӣ ба аҳолии Тоҷикистон аз оғози соли ҷорӣ беш аз 8,2 миллиард сомониро ташкил дод, ки нисбат ба ҳамин давраи соли гузашта баробари 2 фоиз зиёд аст.
Мувофиқи маълумоти Агентии омори назди Президенти ҶТ, ба корхонаю ташкилотҳои расман ба қайд гирифташуда ба маблағи беш аз 4,3 миллиард сомонӣ хидмати пулакӣ расонида шудааст, ки ин 52,2 фоизи ҳаҷми умумии хидматрасониро ташкил медиҳад.
Аз моҳи январ то моҳи октябри соли равон ҳаҷми хидматрасонии пулакӣ дар шаҳри Душанбе назар ба нишондоди миёнаи ҷумҳурӣ 4,6 баробар зиёд гардид.
Ҳамзамон ҳаҷми хидматрасонии пулакӣ дар хадамоти алоқа 18,6 фоиз, Вазорати молия 16,6 фоиз, Вазорати нақлиёт 8,0 фоиз, Вазорати энергетика ва захираҳои об 13,2 фоиз коҳиш ёфтааст.