Иштироки Қ. Расулзода дар ифтитоҳи иншооти ҷашнӣ

Душанбе, 04.11.2014 (АМИТ «Ховар», Фарзонаи Давлат).-Дар рўзҳои таҷлил аз 20-умин солгарди қабули Конститутсия (Сарқонун)-и Ҷумҳурии Тоҷикистон имрўз дар шаҳри Роғун бо иштироки Сарвазири мамлакат Қоҳир Расулзода як зумра иншооти нави замонавӣ мавриди истифода қарор дода шуданд.
 Сарвазири мамлакат нахуст дар расми ифтитоҳи бинои нави замонавии барои осорхона, китобхона, мактаби мусиқӣ ва маркази эҷодии кўдакону наврасон, пешбинишуда иштирок кард. Бинои мазкур аз ду ошёна иборат буда, дорои 27 утоқи кории барҳаво мебошад. 
Тавре ки зимни ифтитоҳи бинои мазкур таъкид гардид, бо бунёди ин бино мушкилоти нарасидани биноҳои муосир барои фаъолияти муассисаҳои бахши фарҳангу маорифи мақомоти иҷроияи маҳаллии ҳокимияти иҷрояи шаҳри Роғун бартараф мегардад.
Ҳамчунин дар ин рўз бинои нави суди шаҳри Роғун мавриди истифода қарор дода шуд. Ин бино бо харҷи беш аз якуним миллион сомонӣ бунёд гардида, дорои шароити муосири корӣ мебошад. 
Дар рўзҳои таҷлил аз 20-умин солгарди қабули Конститутсия (Сарқонун)-и Ҷумҳурии Тоҷикистон ҳамзамон дар ин рўз бо иштироки Сарвазири мамлакат барои сокинону меҳмонони шаҳри Роғун меҳмонхонаи барҳавои сеошёна  мавриди баҳрабардорӣ қарор дода шуд. 
Меҳмонхона аз 3 ошёна иборат буда, бо харҷи беш аз 3 миллион сомонӣ аз ҳисоби маблағҳои буҷети маҳаллӣ бунёд ва  барои 20 рахти хоб пешбинӣ шудааст.