«Истиқлол» — соҳиби Ҷоми қаҳрамон

Душанбе,  14.11.2014. (АМИТ «Ховар»).-  12  ноябр  даври  17 — уми  мусобиқоти  Тоҷикистон  оид ба  футбол  байни  дастаҳои  лигаи  олӣ  бо  ду  вохӯрӣ  анҷом  ёфт. 
Тавре  ки  аз  Федератсияи  футболи  Тоҷикистон  хабар  доданд, дастаи  «Истиқлол» — и шаҳри  Душанбе  дар  майдони  худ  бозиро  бо  ҳисоби  1:1 бо  дастаи  «Далерон» — и  Истаравшан  мусовӣ  кард. 
Баъди  анҷоми  вохӯрӣ   маросими  ба  дастаи «Истиқлол»  супурдани Ҷоми  қаҳрамон  барои  пирӯзиаш  дар  мусобиқоти  Тоҷикистон  дар  соли  2014  баргузор  гардид. Ноиби  президенти  Федератсияи  футболи  Тоҷикистон  Хуршед  Мирзоев мукофоти  фахриро  ба  капитани «Истиқлол» Дилшод  Восиев  супурд.
Дар   вохӯрии  дигар  дастаи «Хуҷанд»  дастаи «Регар —  ТадАЗ» —  и  шаҳри  Турсунзодаро  бо  ҳисоби  3:1 мағлуб  карда,  бо  32  хол дар  ҷадвали  мусобиқот  ҷойи  сеюмро  касб  намуд. 
Тақдири медалҳои  нуқра ва  биринҷӣ  дар   даври  18 -уми  мусобиқот  ҳал  мешавад. 16  ноябр  дастаи  «Хайр» дар  шаҳри  Ваҳдат  дастаи  ССКА «Помир» — и  пойтахтро  қабул  намуда,   дастаи  «Хуҷанд» дар  шаҳри  Қӯрғонтеппа бо  дастаи  «Вахш» қувваозмоӣ менамояд.