Кабакчи ҳамтоёнашро ба «Шоми арӯс» даъват кард

Душанбе, 14.11.2014.(АМИТ «Ховар», Марзия Саидзода).-Мустафо Кабакчи, раиси гурӯҳи дӯстӣ ва ҳамкории Парлумони Туркия бо Маҷлиси намояндагони Маҷлиси Олии Ҷумҳурии Тоҷикистон ҳамтоёни тоҷики худро даъват намудааст, ки дар маҳфили фарҳангии «Шоми арӯсии Мавлоно», ки дар шаҳри Қуния баргузор мегардад, иштирок намоянд. Ҳамзамон ин вакили турк хостори таъсиси «Ҳафтаи Тоҷикистон» дар Парлумони Туркия ва ба роҳ мондани курсҳои омӯзиши забони тоҷикӣ дар донишгоҳҳои Туркия гардидааст.  
      Мустафо Кабакчи -раиси гурӯҳи дӯстӣ ва ҳамкории парлумони Туркия бо Парлумони Тоҷикистон имрӯзҳо бо сафари корӣ бо гурӯҳи вакилон аз Парлумони Туркия Нуриддин Набатӣ, вакил аз шаҳри Истанбул ва Умар Суҳо, вакил аз шаҳри Мугла дар Тоҷикистон қарор доранд. Мустафо Кабакчи дар Душанбе бо Шукурҷон Зуҳуров-раиси Маҷлиси намояндагони Маҷлиси Олии Ҷумҳурии Тоҷикистон мулоқот намуда, масоили марбут ба таҳкими ҳамкориҳои байнипарлумонии Тоҷикистону Туркияро баррасӣ кард.
    Ҳамзамон гурӯҳи вакилони Парлумони Туркия бо фаъолияти палатаи поёнии Парлумони Тоҷикистон шинос гардида, аз осорхонаи Маҷлиси намояндагон дидан намуданд. Инчунин вакилони Парлумони Туркия ба шаҳрҳои Турсунзодаю Норак сафар намуда, аз корхонаи ТАЛКО ва неругоҳи барқии обии Норак боздид менамоянд.