Маҳфили навбатии ҳофизхонӣ дар КМТ

Душанбе, 15.11.2014. (АМИТ «Ховар», Раъно Нусратуллозода).-Дирӯз дар Китобхонаи миллии Тоҷикистон (КМТ) бо иштироки хонандагони Гимназияи № 2 барои хонандагони болаёқати шаҳри Душанбе маҳфили навбатии ҳофизхонӣ баргузор гардид. Дар маҳфил ғазали “Дӯш аз масҷид сӯи майхона омад пири мо, Чист ёрони тариқат баъд аз ин таъбири мо” мавриди таҳлил қарор гирифт.Тавре ки аз Китобхонаи миллӣ иттилоъ доданд, аз ҷониби хонандагон ин ғазали Ҳофиз қироат шуд ва адабиётшиносону иштирокдорони маҳфил андешаҳояшонро пиромуни ин ғазал иброз намуданд. Мавриди зикр аст, ки маҳфили ҳофизхонӣ аз ҷониби Раёсати китобхона ташкил шуда, моҳе ду маротиба баргузор мегардад, ки диққати ҷавононро ба худ ҷалб карда, рӯз то рӯз ҳаводорони маҳфил зиёд гашта истодааст.