Маданият ва муоширати оиладорӣ

Душанбе,18.11.2014. (АМИТ «Ховар», Раъно Нусратуллозода).-Дирӯз дар  факултаи забонҳои хориҷии Донишгоҳи давлатии  Хуҷанд ба номи академик Бобоҷон Ғафуров бо иштироки мудири шуъбаи кор бо занони Кумитаи иҷроияи ҲХДТ дар вилояти  Суғд Ҳамрохон Атаева,  мудири шубаи кор бо занон ва оилаи назди ҳукумати шаҳри Хуҷанд Муҳайё  Дадобоева, устодон ва донишҷӯён маҳфили навбатии «Фарҳанги оиладорӣ» доир гардид.  
Тавре ки аз донишгоҳи мазкур иттилоъ доданд, дар маҳфил дотсенти кафедраи психологияи умумӣ Азиза Мансурова дар мавзӯи «Маданияти муносибат дар давраи бунёди оилаи нав» маърӯза намуда, аз ҷумла афзуд, ки оила сарвати бебаҳои ҷамъият буда, маҳз дар оила инкишофи шахсияти инсон оғоз мегардад ва дар ҳама давру замон он чун муҳити асосию муҳими ташаккули сифатҳои ҳамидаи инсон боқӣ мемонад. Таъмини ҳамзистии осоиштаи фаъолияти самаранок ва нигоҳ доштани муҳити солими психологӣ дар оила ва ҷомеа аз нигоҳ доштани одоби муошират вобастагӣ дорад.