Манзили истиқоматӣ барои кормандони милитсия

Душанбе, 10.11.2014. (АМИТ «Ховар», Мавҷуда Анварӣ).-Имрӯз дар хиёбони Соҳилии шаҳри Душанбе бинои нави нӯҳошёнаи дорои 50 ҳуҷра барои кормандони ҳифзи ҳуқуқ ва тартибот ба истифода дода шуд, ки дар маросими ботантанаи ба истифода додани он Президенти Ҷумҳурии Тоҷикистон Эмомалӣ Раҳмон иштирок намуда, онро дастоварди бузурги даврони соҳибистиқлолӣ номид. Тибқи иттилои сардори Раёсати сохтмони асосии ВКД Раҳмонзода Саиднақш Ҳаким сохтмони бино ҳанӯз соли 2011 аз ҷониби раёсати мазкур оғоз гардид. Барои бунёди бино 12 миллиону 80 ҳазор сомонӣ маблағ масраф гардидааст. Масоҳати умумии манзили истиқоматии бинои мазкур 3550 метри мураббаъро ташкил медиҳад.Бино ҳамчунин барои 50 оила пешбинӣ шуда, он аз 6 хонаи сеҳуҷрагӣ, 30 хонаи дуҳуҷрагӣ ва 14 хонаи якҳуҷрагӣ иборат аст. Бояд гуфт, ки хонаҳои мазкур асосан барои оилаҳои кормандони фавтида, маҷрӯҳон ва собиқадорони соҳаи милитсияи кишвар пешбинӣ шудаанд.