Мунтахаби Тоҷикистон дар Бозиҳои IV соҳилии Осиё

Душанбе, 21.11.2014. (АМИТ “Ховар”, Зарангези Латиф).- Мунтахаби Тоҷикистон дар Бозиҳои IV соҳилии Осиё дар ҷазираи Пҳукети Тайланд бо ду медал дар байни 43 даста дар мақоми 24-ум қарор дорад.  
Мунтахаби Тоҷикистон дар Бозиҳои IV соҳилии Осиё, ки дар ҷазираи Пҳукети Тайланд бо ширкати варзишгарони 43 кишвар то рӯзи 23-юми ноябр идома меёбанд, бо касби ду медал (як тилло ва як биринҷӣ) дар мақоми 24-ум қарор дорад.  
Тоҷикистонро дар ин бозиҳо 19 варзишгар (14 мард ва 4 зан) дар 6 намуд — самбо (2 мард), ҷиу-ҷитсу (3 мард ва 1 зан), гуштии кураш (4 мард), волейболи соҳилӣ (2 мард ва 2 зан), варзиши сабук (ҷаҳидан ба дарозӣ, 1 мард) ва муайтай (3 мард ва 1 зан) намояндагӣ мекунанд.
Ёдовар мешавем, ки паҳлавони маъруфи тоҷик Муҳаммадмурод Абдураҳмонов дар сабқати гуштии кураш дар вазни беш аз 90 кг дар қувваозмоии ниҳоӣ бар Икромиддин Аҳмадӣ аз Афғонистон ғолиб омад ва бо медали тилло мукофотонида шуд. Паҳлавони дигари тоҷик Саидҷалол Саидов дар ин намуд дар вазни то 90 кг бо медали биринҷӣ сарфароз гашт. 
Дар риштаи муайтай бошад, варзишгари тоҷик Ҷомӣ Латифов дар вазни 71 кг дар даври чорякниҳоӣ бар Муҳаммадбердӣ Равшанов аз Туркманистон бо ҳисоби 5-0 пирӯз шуд. 
Имрӯз, 21-уми ноябр, дастаи занонаи волейболи соҳилии Тоҷикистон пас аз се бохт ба тимҳои Тайланд, Ҷопон ва Чин бо ҳисобҳои 0-2 бо тими Қазоқистон бозӣ мекунад.