Мусодираи маводи нашъаовар дар вилояти Суғд

Душанбе, 4.11.2014 (АМИТ “Ховар”, Мавҷуда Анварӣ).-Тайи чанд рӯзи охир аз тарафи кормандони Агентии назорати маводи нашъаовар дар ҳудуди ҷумҳурӣ як силсила чорабиниҳои фаврӣ-ҷустуҷӯӣ гузаронида шуданд.Ҳамин тариқ, дар ҳудуди ҷамоати Ёваи ноҳияи Бобоҷон Ғафуров аз дохили мошини тамғаи «Мерседес Бенс», таҳти идораи шаҳрванди 44 -солаи ҷумҳурӣ бо истифодаи саги хизматӣ маводи нашъадор мусодира гардид.Дар ҷамоати Исфисори ҳамин ноҳия аз хонаи истиқоматкунандаи ноҳияи мазкур 18 бастаи маводи ҳашиш дарёфт шуд. Озмоишгоҳи ташхиси судӣ муайян кард, ки маводи мусодирашуда навъи ҳашиш буда, вазни он зиёда аз 5 килоро ташкил медиҳад. Бо гумонбарии фурӯши маводи нашъаовар дар ҳудуди деҳаи Фароби ноҳияи Панҷакент шаҳрванди 48-сола дастгир шуд, ки дар вақти азназаргузаронии шахсӣ аз ӯ маводи нашъаовари афюн ёфт шуд. Нисбат ба дастгиршудагон парвандаҳои ҷиноятӣ оғоз шудаанд.