Нақши барномаи 1С муҳосибот дар идораи ташкилот

Душанбе, 28.11.2014. (АМИТ «Ховар», Раъно Нусратуллозода).-Бо ибтикори раёсати илми  Донишкадаи молия ва иқтисоди Тоҷикистон ва кафедраи баҳисобгирии муҳосибӣ 27 ноябр дар донишкада бо ширкати доираи васеи устодону толибилмон дар мавзӯи «Нақши барномаи 1С муҳосибот дар идоракунии ташкилот» семинари илмӣ доир гардид. 
Тавре ки  устоди кафедраи баҳисобгирии муҳосибии донишкада  Пайрав Бобомуродов иттилоъ дод, дар семинар муовини ректор оид ба илм Ғиёсиддин Ашуров иброз намуд, кумитаи тадорукоти семинари мазкур тасмим гирифтааст, дар ҳамкорӣ бо пажуҳишгарони макотиби олии кишвар дар соҳаи илм ва тадқиқоти илмӣ тавсияҳои мушаххасро доир ба масоили мавриди назар баррасӣ намояд. 
Аслиддин Комилов, устоди кафедраи баҳисобгирии муҳосибӣ дар мавзӯи «Баҳисобгирии муҳосибӣ дар фаъолияти идоракунӣ» оид ба мақсад, вазифаҳо ва истифодаи барномаи 1С муҳосибот дар низоми идоракунии ташкилот сухан гуфта,  зикр намуд, ки яке аз ҳадафҳои истифодаи барномаи 1С муҳосибот ин автоматикунии ҷои кори коргарон аст. 
Ҳамчунин дар семинар маърӯзаҳо дар мавзӯи «Барномаи 1С муҳосибот дар ташкилотҳои буҷетии Ҷумҳурии Тоҷикистон, «Нақши барномаи 1С муҳосибот дар шароити муосир ва ҳалли амалиёти муҳосибӣ», «Ҷоринамоӣ ва истифодаи СБҲМ дар Ҷумҳурии Тоҷикистон» шунида шуд, ки фарогири масоил оид ба мавқеи барномаи 1С муҳосибот ва ҷоринамоии он дар ташкилотҳои буҷавӣ, ҳалли масъалаҳои амалиёти муҳосибӣ бо ёрии ин барнома ва таҷрибаи ҷаҳонии ҳисобдорӣ буд.