Нашри китоби «Султони заҳмат» ба забони қазоқӣ

Душанбе, 11.11.2014. (АМИТ «Ховар», Муқаддас Темурзода).- Тавре ки қаблан хабар дода шуда буд, соли 2012 китобе дар бораи ҳаёту фаъолияти Президенти Қазоқистон Нурсултон Назарбоев дар жанри публисистикаи таърихию сиёсӣ ба забонҳои русӣ ва тоҷикӣ аз чоп баромада буд. Нависандаи маъруфи тоҷик Воҳид Ғаффорӣ (Абдувоҳид Ғаффоров) муаллифи китоб ва мушовири калони Дастгоҳи иҷроияи Президенти Тоҷикистон Зафар Сайидзода ҳаммуаллифи консепсия ва муҳаррири масъули ин асар мебошад. Дар китоб симои Президенти Қазоқистон ҳамчун инсону сиёсатмадор тасвир ёфтааст. Чанде пеш нашриёти «Энсиклопедияи қазоқ» дар шаҳри Алмаато ин китобро бо теъдоди ду ҳазор нусха рӯи чоп овард.Қобили зикр аст, ки ин нахустин китоби муаллифони хориҷӣ дар бораи ҳаёту фаъолияти Президенти Қазоқистон Нурсултон Назарбоев аст, ки ба забони қазоқӣ тарҷума ва интишор шудааст. Ёдовар мешавем, ки китоби «Султони заҳмат» бори нахуст дар Тоҷикистон нашр шуда буд. Сафири Қазоқистон дар Тоҷикистон Оғибой Смагулов дар робита бо интишори китоб ба забони русӣ зикр намуд, ки он бо амиқ донистани таърихи Қазоқистони мустақил иншо шуда, дар он ҳамаи воқеаҳое, ки тайи 20 сол рух додаанд, равшан зикр ёфтаанд. Ба муносибати нашри ин китоб ба намояндагони ҷомеа ва зиёиёни эҷодкори Тоҷикистон изҳори сипос намуда, зикр шуда буд, ки ҳарчи бештар воқиф шудан аз ҳаёти якдигар, муносибатҳои дӯстию ҳамкории байни халқу давлатҳои Тоҷикистону Қазоқистонро боз ҳам мустаҳкамтар мегардонад.