Нигаронии Президент аз таълиму тарбияи наврасон

Душанбе, 12.11.2014. (АМИТ «Ховар», Муқаддас Темурзода).- «Ҳукумати кишвар ба масъалаи таъмин намудани фаъолияти мунтазами муассисаҳои таҳсилоти миёнаву умумии мамлакат аҳамияти аввалиндараҷа медиҳад»,-таъкид дошт имрӯз зимни боздид аз ноҳияи Ёвони вилояти Хатлон Президенти Ҷумҳурии Тоҷикистон Эмомалӣ Раҳмон.Сарвари Давлат ҳамчунин изҳор дошт, ки раванди бунёди мактабҳои замонавӣ, таъмини онҳо бо таҷҳизоту технологияҳои муосир ва лавозимоти хониш бомаром идома дошта, ҷиҳати баланд бардоштани сатҳи дониши хонандагон ва таҷрибаи омӯзгорон ҳамаи чораҳои зарурӣ амалӣ мешаванд.Натиҷаи ҳамин аст, ки то охири соли ҷорӣ дар ноҳияи Ёвон 16 иншооти соҳаи маориф, аз ҷумла мактабҳои нав ва синфхонаҳои иловагӣ барои қариб 2000 нафар хонанда ба истифода дода мешавад.«Бо вуҷуди ин хотирнишон месозам, ки агарчи сол ба сол шумораи хонандагони ба муассисаҳои таҳсилоти олии касбӣ дохилшуда афзоиш меёбад, вале ин дастовард ҳоло қонеъкунанда нест.Хусусан дар самти боз ҳам беҳтар ба роҳ мондани корҳои таълиму тарбия, пешгирӣ кардани ҳолатҳои аз таҳсил берун мондани наврасон ва хусусан духтарон андешидани тадбирҳои иловагӣ ва доимӣ зарур аст», — изҳори нигаронӣ намуд Э. Раҳмон.