Омодагии Фархор ба давраи зимистон

Душанбе, 24.11.2014. (АМИТ «Ховар»,  Мавҷуда Анварӣ). — Масъулони ноҳияи Фархор баҳри самарабахш гузаронидани давраи тирамоҳу зимистони солҳои 2014 — 2015» тадбирҳои зарурӣ андешидаанд. Бо саъю кӯшиши ҳамвораи масъулони ташкилоту муассисот дар ноҳия 870,7 тонна ангишт, 2563 метри мукааб ҳезум, 33770 дона брикет ва 7855 литр сӯзишвории дизелӣ захира шудааст.
Бино ба иттилои мудири шуъбаи маориф ва илми ноҳия Ғазалшоҳ Сафарзода дар 65 муассисаи таълимӣ шишабандии синфхонаҳо, таъмиру бо сӯзишворӣ таъмин кардани генераторҳо барои гузарондани машғулиятҳои амалии фанни компютер, захираи ҳезуму ангишт ва дигар маводи сӯхту гармидиҳанда  иҷро гардид. 
Муассисаи давлатии нигоҳдории роҳҳои ноҳия нигоҳдошти 314,4 километр роҳҳои маҳаллӣ ва 95,4 километр роҳҳое, ки аҳамияти ҷумҳуриявию байналмилалӣ доранд, ба уҳда дорад. Масъулон баҳри бемамониат пушти сар намудани зимистон дар роҳҳои ноҳия бо харҷи 31 ҳазору 59 сомонӣ  маводи зиддилағжишро захира намудаанд.