Ошкоршавии азхудкунии моли корхона

Душанбе, 13.11.2014. АМИТ «Ховар», Муқаддас Темурзода).- Дирӯз дар натиҷаи гузаронидани чорабиниҳои фаврӣ-ҷустуҷӯӣ аз ҷониби кормандони милитсия муайян гардид, ки шаҳрванд Аскар Шарифов, соли таваллудаш 1967, сокини ноҳияи Исфара, собиқ сардори КВД ҷумҳуриявии “Тоҷикагролизинг” аввалҳои моҳи январи соли 2014 бо сӯиистифода аз мансаб дидаю дониста 1 адад трактори тамғаи “Тоҷирон”-ро, ки ба корхонаи мазкур барои истифода дода шудааст, бо роҳи сохтакорӣ ҳуҷҷат тайёр намуда, аз худ кардааст. Сипас, ин тракторро ба шаҳрванди Ҷумҳурии Қирғизистон Абдувосит Одилов, соли таваллудаш 1970 ба маблағи 15 ҳазор доллари амрикоӣ фурӯхта, маблағи онро барои эҳтиёҷоти худ сарф намудааст. Нисбат ба далели мазкур парвандаи ҷиноятӣ оғоз гардида, тафтиш идома дорад.