Парлумон ба «Қолинҳои Суғд» имтиёзҳои андозӣ дод

Душанбе, 12.11.2014.(АМИТ «Ховар», Марзия Саидзода).-12 ноябр палатаи поёнии Парлумони Тоҷикистон бо ворид намудани тағйиру илова ба лоиҳаи Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2014» ба ду корхонаи азими саноатии кишвар имтиёзҳои андозӣ дод, ки яке аз онҳо ҶДММ «Қолинҳои Суғд», воқеъ дар шимоли мамлакат мебошад. Меҳринамо Ҷонмамадова -муовини вазири молияи ҷумҳурӣ дар назди вакилони Маҷлиси намояндагон гуфт, ки корхонаи саноатии «Қолинҳои Суғд» ҷиҳати воридоти як адад дастгоҳи бофандагӣ аз Белгия аз пардохти андоз аз арзиши иловашуда ва боҷи гумрукӣ дар ҳаҷми 1, 5 миллион сомонӣ озод мешавад. Арзиши умумии дастгоҳи бофандагии аз Аврупо воридшаванда 956 ҳазору 500 евро ё беш аз 6 миллион сомонӣ буда, пардохтҳои гумрукии он 1,5 миллион сомонӣ, аз ҷумла андоз аз арзиши иловашуда 1, 2 миллион сомонӣ ва боҷи гумрукӣ 0,3 миллион сомониро ташкил медиҳад. Ворид ва насби дастгоҳи бофандагӣ имконият медиҳад, ки сифати маҳсулот ба маротиб беҳтар гардида, ҳаҷми истеҳсоли маҳсулоти солона то ба 720 ҳазор метри мураббаъ зиёд гардонида шавад. Инчунин он ба таъсиси ҷойҳои нави корӣ ва ворид намудани маблағҳои иловагӣ ба буҷет имконият ва шароит фароҳам меорад.