«Помир» — иштирокчии бозиҳои нимниҳоӣ

Душанбе, 12.11.2014. (АМИТ «Ховар»).- 10 ноябр дар шаҳри Душанбе қисми хотимавии мусобиқоти Тоҷикистон байни футболбозони ҷавони соли таваллудашон 1997 — 1998 оғоз ёфт. Барои ноил шудан ба унвони қаҳрамони ҷумҳурӣ 8 дастаи минтақаҳои мухталифи кишвар ширкат доранд. Тавре ки сардори шуъбаи футболи кӯдакону наврасони Федератсияи футболи Тоҷикистон Анваршо Мирзоев хабар дод, дар марҳалаи пешакӣ дастаҳо ба ду гурӯҳ тақсим карда шуданд. Ба гурӯҳи «А» дастаҳои «Энергетик» — и шаҳри Душанбе, «Суғдиён» — и Чкалов, «Хулбук» — и Восеъ ва «Орзӯ» — и Шаҳринав шомиланд. Гурӯҳи «Б» иборат аз дастаҳои Мактаби ҷумҳуриявии маҳорати баланди варзишӣ, «Зарафшон» — и Панҷакент, «Бешкент» — и ноҳияи Носири Хусрав ва «Помир» — и шаҳри Хоруғ аст. Аз рӯи натиҷаи марҳалаи гурӯҳӣ ду дастаи беҳтарин барои гирифтани роҳхат ба вохӯрии нимниҳоӣ муайян карда мешавад. Бозиҳои ду даври мусобиқот баргузор шуданд. Дар гурӯҳи «А» дастаи «Хулбук» — и Восеъ пешсаф аст. Дастаи мазкур бо ҳисоби 4:0 дастаи «Энергетик» — и пойтахтро мағлуб сохта, бозиро бо дастаи «Суғдиён» — и Чкалов бо ҳисоби 1:1 мусовӣ намуд. Дастаҳои «Энергетик» ва «Орзӯ» ҷойҳои дуюм ва сеюмро ишғол менамоянд. Дар гурӯҳи «Б» дастаи «Помир» 6 хол ба даст оварда, ба вохӯрии нимниҳоӣ роҳхат гирифт. Барои гирифтани роҳхати дуюм ба вохӯрии нимниҳоӣ дастаҳои Мактаби ҷумҳуриявии маҳорати баланди варзишӣ ва «Зарафшон» — и Панҷакент иддао доранд.Ёдовар мешавем, ки бозиҳои ниҳоии мусобиқот 14 ноябр баргузор мешаванд.