Президент : «Бунёди роҳи оҳан рушди босуботи кишвар»

Душанбе, 12.11.2014. (АМИТ «Ховар», Муқаддас Темурзода).- «Ҳукумати мамлакат бо мақсади ҳарчи зудтар амалисозии лоиҳаи сохтмони роҳи оҳани Душанбе — Қӯрғонтеппа, қитъаи “Ваҳдат-Ёвон” дар баробари истифода аз сарчашмаҳои дохилӣ ҷиҳати ҷалби сармоягузории хориҷӣ ба маблағи беш аз 360 миллион сомонӣ чораҳои мушаххасро амалӣ карда истодааст»,- зикр намуд Президенти Ҷумҳурии Тоҷикистон Эмомалӣ Раҳмон имрӯз зимни мулоқот бо фаъолон ва аҳолии ноҳияи Ёвони вилояти Хатлон.Сарвари Давлат ҳамчунин изҳор дошт, ки то имрӯз танҳо аз ҳисоби сарчашмаҳои дохилӣ 245 миллион сомонӣ азхуд карда шуда, 375 нафар коргар дар ду баст фаъолият доранд.Бунёду мавриди истифода қарор додани ин қитъаи роҳи оҳан дар рушди босуботи мамлакат, аз ҷумла вилояти Хатлон ва махсусан ноҳияи Ёвон аҳмияти калони иқтисодиву иҷтимоӣ дорад.«Зеро тавассути бунёди роҳи оҳани мазкур пойтахти мамлакат бо калонтарин вилоят пайваст карда мешавад, ки боз як қадами устувор барои амалисозии ҳадафи стратегии баромадан аз бунбасти коммуникатсионӣ мебошад»,-афзуд Президент.