Пули нав-пайвандгари ду деҳа

Ванҷ, 24.11.2014. (АМИТ «Ховар», Файз Мирасан).- Дар рӯзи  таҷлили  ҷашни Парчами миллии Ҷумҳурии Тоҷикистон бо ба истифода додани пули нави мошингард робита байни сокинони  деҳаҳои  Ванҷ ва Мурқутгаи ҷамоати деҳоти Рованди ноҳияи Ванҷ бо маркази ҷамоати ин  ноҳия барқарор шуд.
Ин пул 10 сол қабл бар асари обхезӣ комилан хароб гардида, дигар рафтуомад аз болои он номумкин гашт. Мардум маҷбур буданд, ки  барои ҳалли мушкилоташон  аз  кӯпруки  чӯбини пиёдагард истифода баранд. 
 Роҳи ягонаи мошингард низ, ки сокинони ин деҳотро бо маркази ҷамоат мепайвандад, тахриб гашта буд.  Дар баробари бунёди пул роҳсозони Муассисаи давлатии идораи хоҷагии роҳҳои  мошингарди  ВМКБ  ҳамчунин  роҳи мошингардро, ки зиёда аз даҳ километр  дарозӣ дорад, таъмир  намуданд.