Роҳзанӣ дар нуқтаи мубодилаи асъор

Душанбе, 17.11.2014. (АМИТ «Ховар», Муқаддас Темурзода).- Дирӯз тахминан соати 21.10 дақиқа шахси номаълуми мусаллаҳ бо корд бо роҳи зӯроварӣ вориди нуқтаи мубодилаи асъор, воқеъ дар кӯчаи Синои шаҳри Душанбе шуда, 3 маротиба ба бадани корманди коргоҳи мазкур Саймуъмин Баллаев, соли таваллудаш 1981 ва 1 маротиба ба бадани шаҳрванд Алишер Ҳайитов, соли таваллудаш 1981, сокини ноҳияи Шаҳринав бо корд зада, аз он ҷо ҷамъ 7400 доллари ИМА маблағи пулиро тасурруф намуда, аз ҷойи ҳодиса ғайб задааст. 
Дар натиҷа шаҳрванд С. Баллаев ҷароҳатҳои ҷисмонӣ бардошта, дар беморхона бистарӣ гардидааст. Дар натиҷаи гузаронидани чорабиниҳои фаврӣ-ҷустуҷӯӣ аз ҷониби кормандони милитсияи шуъбаи ВКД-1 дар ноҳияи Сино бо гумони даст доштан дар содир намудани ҷинояти роҳзанӣ шаҳрванд Шуҳрат Игамбердиев, соли таваллудаш 1977, сокини ноҳияи Шуғнон дастгир гардид. Далелҳои шайъӣ гирифта шуда, нисбат ба далели мазкур парвандаи ҷиноятӣ оғоз гардида, тафтиш идома дорад.
Дар ин бора ВКД ҶТ иттилоъ медиҳад.