Савгандёдкунии наваскарон дар КҲФ МГ

Душанбе, 18.11.2014. (АМИТ «Ховар», Лайло Тоирӣ).- Имрӯз,  18 ноябр дар қисми низомии 45005 -и Кумитаи ҳолатҳои фавқулода ва мудофиаи гражданӣ маросими савгандёдкунии наваскарон баргузор гардид. 
Бино ба иттилои хадамоти матбуоти кумита, сараввал падару модарони наваскарон бо шароити зисти қисми низомии мазкур ошно гардиданд.  
Тавре ки аз Кумитаи ҳолатҳои фавқулода ва мудофиаи гражданӣ  хабар доданд, ба ин қисми низомӣ 29 нафар сарбоз барои адои хизмат даъват шуда, онҳо то маросими савгандёдкунӣ муддати як моҳ курси ибтидоии ҳарбиро гузаштаанд. Наваскарон дар ин қисми низомӣ 2 сол  хизмат хоҳанд кард.  Наваскароне, ки то даъват ба хизмат дар мактабҳои олӣ таълим гирифта, соҳиби маълумоти олӣ мебошанд, ба муддати як сол ба хизмат ҷалб хоҳанд гашт.
Дар ҷараёни маросими савгандёкунӣ масъулини соҳа, падару модарон сухан гуфтанд. Дар  фарҷоми маросими савгандёдкунӣ барои ҷамъомадагон консерти идона намоиш дода шуд.