Ш.Саид: «Савдо роҳро мехоҳад»

Душанбе,  17.11.2014. (АМИТ «Ховар»,  Покизаи  Шодмон).-  Чанде  пеш  раиси Палатаи  савдо ва  саноати  ҶТ  Шариф  Саид  бо  раиси гурӯҳи  парлумонии   дӯстии  «Туркия — Тоҷикистон»  Мустафо  Қабақчӣ  мулоқот  анҷом  дод.
 Тавре ки  ПСС ҶТ   хабар  медиҳад,   зимни  мулоқот  масоили  ҳамкории  тиҷоратию  иқтисодӣ, илмию техникӣ ва  фарҳангии  Туркия  ва  Тоҷикистон,  ҳамчунин  ҳамкории шӯроҳои   соҳибкорони   ҳар  ду  кишвар мавриди  муҳокима  қарор  гирифтанд.
Дар  мулоқот   зарурати  густариши   ҳамкории  дуҷониба бо   назардошти дар  минтақа  афзун  намудани  роҳҳои нақлиётию  транзитӣ зикр  гардид. 
«Савдо  роҳро  мехоҳад.  Роҳҳо  набзи  ҳар  иқтисодиёт ба  шумор  мераванд. Мақсад  аз  саъю  кӯшишҳои  Ҳукумати  ҶТ  дар  ҷумҳурӣ  фароҳам овардани   шабакаи  васеи   нақлиётӣ  ва  ба низоми нақлиётии  ҷаҳон  ворид  намудани  он  аст. Тоҷикистон роҳҳои  мошингард ва  пулу   нақбҳоро   босуръат  таҷдид  ва  бунёд  мекунад. Сабаби  ин  ба шабакаи  ҷаҳонии  боркашонии  автомобилӣ  пайвастани   кишвар аст»,  —  гуфт  Шариф  Саид.