Словакия хоҳони ҳамкорӣ бо Тоҷикистон аст

Душанбе,  21.11.2014. (АМИТ «Ховар»).- 19  ноябр  раиси Палатаи  савдо ва  саноати  ҶТ Шариф  Саид  дар  шаҳри  Душанбе бо  сафири  Словакия  дар  Тоҷикистон Павол Иван   мулоқот  анҷом  дод. 
Тавре  ки  ПСС ҶТ  хабар медиҳад,  Шариф  Саид  зимни  мулоқот   зикр  намуд, ки   ташрифи  дипломати олимақом ба  ҳамкории  дуҷониба  қувваи  нав  мебахшад. «Барои рушди   равобити тоҷирону  соҳибкорони Словакия  ва  Тоҷикистон  имкониятҳои  зиёде  мавҷуданд.  Мушкилоти  асосии  равобити  тиҷоратию  иқтисодӣ иборат  аз  мавҷуд  набудани иттилооти  зарурӣ  дар  бораи имкониятҳои   кишварҳоямон  мебошад», —  гуфт  раиси  ПСС ҶТ. 
Ҷонибҳо  масоили  тарбияи   кадрҳо  барои тиҷорати  хурду  миёна  дар  Словакия бо  василаи  доир  намудани  курсҳои  кӯтоҳмуддати  омӯзишӣ,  ҷалби  технологияҳои  муосир  ва сармояҳои  хориҷӣ  ба  иқтисодиёти  Тоҷикистон,   бунёди  корхонаҳои  муштараки  саноатиро  муҳокима  намуданд.
Дар  ҷараёни  мулоқот зикр  шуд, ки Агентии тиҷорати Словакия  ба  манзури  дастгирии   ниҳодҳои тиҷорати  хурду  миёна хоҳони  дар  Тоҷикистон доир  намудани ҳамоишу  анҷуманҳои  муштараки тоҷирону соҳибкорон аст.