Сохтмони корхонаи коркарди нафт дар Турсунзода

Турсунзода, 13.11.2014 (АМИТ “Ховар”, Ҳотами Шариф).-Дар шаҳри Турсунзода барои фаъолияти соҳибкорӣ шароитҳои мусоид муҳайё гардидаанд. Соҳибкорон дар ҳамдастӣ бо мақомоти иҷроияи ҳокимияти давлатӣ баҳри ободонии ҷомеа саҳми арзандаи худро мегузоранд. Мисоли ин гуфтаҳо ба истифода додани чор муассисаи таълимии асосӣ дар деҳоти шаҳр, сӣ синфхонаи иловагӣ, даҳҳо марказҳои хизматрасонӣ дар деҳот ва дохили шаҳр, бунгоҳҳои тиббӣ ва ду маркази ташхисию табобатӣ дар маркази шаҳр мебошад. 
Инчунин имрӯз дар ҳудуди шаҳр сохтмони панҷ бинои баландошёнаи истиқоматӣ босуръат ҷараён дорад ва рӯзҳои наздик онҳо низ мавриди баҳрабардорӣ қарор хоҳанд гирифт. Ҳамчунин дар корхонаи чинибарории шаҳр коргоҳҳои иловагии дорусозию хиштбарорӣ ва дигар корхонаҳои истеҳсоли масолеҳи сохтмонӣ дар арафаи анҷомёбианд. Тибқи нақша сохтмони як корхонаи коркарди нафт низ дар назар аст.