Таҷлили Рӯзи Парчами давлатӣ дар Душанбе

 
Душанбе, 24.11.2014. (АМИТ «Ховар», Зарангези Латиф).- Рӯзи Парчами давлатии Ҷумҳурии Тоҷикистон иди ҷавонтарини ҷумҳурии тозаистиқлоли мо буда, дар сартосари кишвар бо шукӯҳу шаҳомати хос таҷлил мегардад.
Боиси хушнудии ҳар тоҷикистонист, ки баландтарин сутуни 165 метре, ки дар он парчам партавфишонӣ мекунад, маҳз дар пойтахти мо — Душанбеи нозанину ҳамешабаҳор ҷойгир мебошад.
Имрӯз низ аз чор ноҳияи Душанбе дар Майдони Парчами давлатӣ, соати 16.00 ҷавонону зиёиён ҷамъ меоянд.
Тавре ки Ҳунарпешаи халқии Тоҷикистон Набӣ Ҷалолов, саркоргардони намоиш иброз дошт, дар барномаи ҳунарӣ сарояндагон ва дастаҳои ҳунарии беҳтарин шомиланд, ки ба ин ид ҳусну таровати хосса зам мекунанд.
Дар ин бора аз дафтари матбуоти Вазорати фарҳанг иттилоъ доданд.