Талоши паҳлавонони ҷавон барои Ҷоми “Вастан”

Душанбе,  21.11.2014 (АМИТ «Ховар»).- Дувумин мусобиқаи кушода оид ба дзюдо байни наврасон барои Ҷоми «Вастан” рӯзҳои 22-23 ноябр дар шаҳри Душанбе баргузор мешавад.
Тавре аз Кумитаи миллии олимпии Тоҷикистон хабар доданд, рӯзҳои истироҳат дар шаҳри Душанбе дувумин мусобиқаи кушода оид ба дзюдо байни наврасони солҳои таваллудашон 1997-1999 барои Ҷоми Клуби варзишии «Вастан” барпо мегардад. 
Дар ин мусобиқа ба ҷуз варзишгарони тоҷик, гуштигирони ҷавони Афғонистон, Беларус, Қазоқистон, Қирғизистон, Озарбойҷон, Русия, Туркия, Узбакистон ва Эрон ширкат хоҳанд кард. 
Ба ғолибони мусобиқа дар 9 вазн — 46, 50, 55, 60, 66, 73, 81,90, +90 кг ба ҷуз медалу диплом, ҷоизаҳои молӣ (барои ҷойҳои аввал 300 доллар, барои ҷойҳои дувум 200 доллар ва барои ҷойҳои севум 100 доллар) супурда мешавад.
Ин мусобиқа дар Маҷмааи варзишии Кумитаи андози Тоҷикистон, ки 1,5 ҳазор ҷойгоҳ дорад, 22-юми ноябр соати 10-и субҳ оғоз меёбад. Маросими ифтитоҳи ботантанаи мусобиқа рӯзи шанбе соати 16:30 барпо мегардад