Тиллодузд дастгир шуд

Б. Ғафуров, 15.11.2014. (АМИТ “Ховар”, Абдуаҳад Шарифзода).-Ба иттилои мақомоти милисияи вилояти Суғд 10 ноябри соли ҷорӣ ба шуъбаи ВКД дар ноҳияи Бобоҷон Ғафуров сокини 34- солаи ҷамоати деҳоти Ҳайдар Усмонови ин ноҳия Б.Пулотов бо аризаи шикоятӣ муроҷиат намудааст. Ба гуфти аризадиҳанда тахминан соатҳои 10-и 9 ноябри соли ҷорӣ бо истифода аз набудани соҳибхона шахси номаълум ба тариқи пинҳонӣ ба ҳавлии ӯ ворид гашта, аз дохили сандуқ чанд намуд ҷавоҳироти тиллоиро ба маблағи умумии 12 ҳазору 804 сомонӣ тасарруф намуда, аз ҷои ҳодиса ғайб задааст. Тибқи аризаи воридшуда, аз тарафи кормандони милисияи ноҳия дар натиҷаи гузаронидани чораҳои фаврӣ-ҷустуҷӯӣ бо гумони даст доштан дар дуздии мазкур шаҳрванд С.Х, соли таваллудаш 1989, истиқоматкунандаи шаҳри Хуҷанд боздошт шуд. Тавре ки дар ҷароаёни тафтиш аён гашт, дастгиршуда С.Х. муддате чанд дар ҳавлии истиқоматии шаҳрванд Б.Пӯлотов ба корҳои таъмирӣ машғул буда, бо истифода аз набудани соҳибхона даст ба ин ҷиноят задааст. Далели шайъӣ гирифта шуда, оид ба ин ҳодиса парвандаи ҷиноӣ бо моддаи 244 қисми 2-и КҶ ҶТ оғоз шудааст.