Тоҷикистон — Туркия : муомилоти мол меафзояд

Душанбе,  17.11.2014. (АМИТ «Ховар»,  Покизаи  Шодмон).- Охири  ҳафтаи  гузашта  вазири  рушди  иқтисод ва  савдои  Тоҷикистон  Шариф  Раҳимзода  дар  шаҳри  Душанбе бо  раиси  гурӯҳи  байнипарлумонии  дӯстии «Туркия — Тоҷикистон»  Мустафо Қабақчӣ  мулоқот  анҷом  дод. 
Тавре  ки  аз Вазорати  рушди  иқтисод  ва  савдои  ҷумҳурӣ  ба  АМИТ «Ховар»  хабар  доданд,   дар  ҷараёни  мулоқот  зикр   шуд, ки   соли  гузашта   муомилоти  савдои  хориҷии байни ҳар  ду  кишвар 650  миллион  доллари  ИМА — ро ташкил  дод. Тайи  9  моҳи  соли  ҷорӣ  муомилоти  моли  байни  Тоҷикистону  Туркия  баробари 456  миллиону  200  ҳазор  доллари  ИМА  буд.
Мувофиқи  суханони  манбаъ, ҷонибҳо  ҳамчунин ҷиҳатҳои  мухталифи  ҳамкории  иқтисодӣ  ва рушди  муомилоти хориҷии  байни ҳар  ду  кишвар,  доир  намудани  ҷаласаи  навбатии  комиссияи  байниҳукуматӣ  оид ба  ҳамкории  тиҷоратию  иқтисодӣ, ташкили  ярмаркаю ҷаласаҳои   соҳибкорон ва  аҳли  тиҷорати  аҳли  кишварро  мавриди  муҳокима  қарор  доданд.