Ваҳдат оқибатҳои зилзиларо бартараф мекунад

Душанбе,  14.11.2014. (АМИТ «Ховар»,  Екатерина  Пасторова ).- Аз он рӯзи зилзилаи  сахттаринро  ҳис  кардани  сокинони  Ваҳдат  ва  мавзеъҳои  назди он  расо  як  сол  сипарӣ  шуд. Ҳоло  дар  Ваҳдат  ва  мавзеъҳои  назди он   биноҳои  аз  таъсири  зилзила  харобшуда барқарор  намуда,  биноҳои  нави  истиқоматӣ  ва   мактабу   нуқтаҳои тиббӣ  бунёд  карда  мешаванд. 
12  ноябр  маросими   расман   мавриди  истифода  қарор  додани   нуқтаи  нави тиббии  сокинони   шаҳраки  Арбобдара, ки бар  асари  зилзилаи  соли  2013   аз  ҳама  бештар  зарар дида  буд,  баргузор гардид.
Дар  маросими   ифтитоҳи  нуқтаи нави  тиббӣ  президенти ширкати «Samsung ElectronicsCentral Eurasia»  ҷаноби  Син Сик Чой  ширкат  дошт.  Дар  ин  маросим  намояндагони баландпояи  мақомоти  ҳокимияти  давлатии  ноҳияи  Ваҳдат,  аз ҷумла намояндагони  Кумитаи  ҳолатҳои  фавқулодда  ва  мудофиаи  шаҳрвандии  ҶТ  дар  шаҳри  Ваҳдат,  муассисаҳои тиббӣ ва  сокинони  сершумор  ҳузур  доштанд.
Ба  гуфтаи  ҳамоҳангсози Лоиҳаи  таҷдиди  нуқтаи  тиббии  шаҳраки Арбобдара  Малика Бобоҷонова,  сохтмони   нуқтаи  нави тиббӣ  ба  туфайли  дастгирии   ширкати «Samsung ElectronicsCentral Eurasia» —  ширкати  калони   байналмилалӣ, ки дар  бисёр  кишварҳои  ҷаҳон  фаъолият  дорад, имконпазир  гардид.