Вохӯрӣ бо корфармоёни Санкт-Петербург

Душанбе, 11.11.2014. (АМИТ «Ховар», Лайло Тоирӣ).- -Тавре ки хабар додем, 8 ноябри соли 2014 дар Вазорати меҳнат, муҳоҷират ва шуғли аҳолии Ҷумҳурии Тоҷикистон вохӯрии корфармоён- намояндагони ширкатҳои шаҳри Санкт-Петербурги Федератсияи Русия бо шаҳрвандони Ҷумҳурии Тоҷикистон баргузор гардид. Мақсади вохӯрӣ бо кор таъмин намудани шаҳрвандони ҶТ дар корхонаю ташкилот ва муассисаҳои шаҳри Санкт-Петербург буд. Бино ба иттилои Раёсати муносибатҳои байналхалқӣ ва робита бо ҷомеаи вазорат, дар вохӯрии мазкур, инчунин субъектҳои хоҷагидоре, ки ба интиқоли қувваи корӣ ба хориҷи кишвар машғуланд, иштирок доштанд. Дар ҷараёни мулоқот шаҳрвандоне, ки хоҳиши дар Федератсияи Русия кор карданро доранд, анкета ва саволномаҳоро пур намуда, ба намояндагони шаҳри Санкт-Петербург пешниҳод намуданд. Бояд зикр намуд, ки ин аввалин мулоқоти бевоситаи корфармоёни шаҳри Санкт-Петербург бо шаҳрвандони ҷумҳурӣ дар Тоҷикистон буда, дар он зиёда аз 200 нафар шаҳрванд иштирок дошт.