Вохӯрии С.Аслов бо К.Соноура

Душанбе, 12.11.2014 (АМИТ «Ховар»).- 12 ноябри соли 2014 вохӯрии Вазири корҳои хориҷии Ҷумҳурии Тоҷикистон Сироҷидин Аслов бо Муовини парлумонии вазири корҳои хориҷии Япония Кентаро Соноура баргузор гардид.Зимни суҳбат ҷонибҳо аз рушди бемайлони робитаҳо ва сатҳи баланди эътимоду шарикӣ миёни ду кишвар изҳори қаноатмандӣ намуда, дурнамои густариши робитаҳои Тоҷикистону Япония дар соҳаҳои мухталиф ва роҳҳои фаъол намудани хамкориҳои байнисоҳавӣ ва тавсеаи заминаи шартномавию ҳуқуқии муносибатҳои дуҷонибаро баррасӣ карданд. Кумакҳои Япония дар татбиқи лоиҳаҳои рушди соҳаҳои иҷтимоиву иқтисодии Тоҷикистон ва нақши созандаи ин кишвар дар тавсеаи ҳамкориҳои минтақавӣ баланд арзёбӣ карда шуд.Зимни суҳбат ҳамчунин дар атрофи масъалаҳои мубрами минтақавию ҷаҳонӣ, аз ҷумла таъмини рушди босуботи Осиёи Марказӣ, вазъи Афғонистон ва расонидани кумакҳои минбаъда дар ҷиҳати эҳёи иқтисодиёти ин кишвар табодули назари судманд сурат гирифт.