Қарзҳои бефоиз барои тоҷирони зарардида
Хуҷанд, 20.12.2014. (АМИТ “Ховар”, Абдуаҳад Шарифзода).-Бахши суғдии Кумитаи Имдоди Имом Хумайнӣ чанд тан аз зарардидагони сӯхтори марказҳои савдои Хуҷандшаҳрро бо маблағҳои пулӣ дастгирӣ намуд.
Тавре ки ба АМИТ “Ховар” роҳбари бахши суғдии Кумитаи Имдоди Имом Хумайнии Ҷумҳурии Исломии Эрон Фирдавс Ашӯрматов иттилоъ дод, дирӯз дар бинои бахши суғдии кумитаи мазкур баҳри дастгирии соҳибкорони зарардидаи марказҳои савдои “Баҳор” ва “Сино” кумаки молиявӣ чун қарзи бефоиз ба муҳлати ду сол ба 20 нафар зарардидаи офати сӯхтор, ба ҳар кадоме ба маблағи 4000 сомонӣ супорида шуд.
Ба гуфти манбаъ, ғайри ин инчунин ба 2 нафар зане, ки бо дӯзандагӣ машғул аст ва бар асари сӯхтори ба вуқӯъ омада дастгоҳҳои дӯзандагиашон хароб гаштааст, мошинаҳои дарздӯзии замонавӣ тақдим шуд.