Ҳаҷми қарздиҳӣ дар кишвар афзуд

Душанбе, 30.12.2014. (АМИТ «Ховар», Покизаи Шодмон).- Аз рӯи натиҷаи фаъолият тайи 11 моҳи соли ҷорӣ бақияи умумии қарзҳо дар ҳудуди Тоҷикистон 9 миллиарду 370 миллион сомониро ташкил дод, ки нисбат ба ҳамин давраи соли гузашта баробари 25,8 фоиз зиёд аст. Тавре ки аз хадамоти матбуоти Бонки миллии Тоҷикистон ба АМИТ «Ховар» хабар доданд, аз ҷумлаи ин маблағ 54,9 фоиз (5 миллиарду 100 миллион сомонӣ) – и онро қарзҳои кӯтоҳмуддат ва 45,1 фоиз (4 миллиарду 200 миллион сомонӣ) — ро қарзҳои дарозмуддат ташкил медиҳанд.Тайи 11 моҳи соли равон фисади миёнаи қарзҳо ба ҳисоби асъори миллӣ 24,70 фоиз ва ба ҳисоби асъори хориҷӣ 23,32 фоизи солонаро ташкил дод, ки ин нисбат ба ҳамин давраи соли гузашта баробари 0,71 фоиз ё 0,39 фоиз камтар аст.Назар ба иттилои Бонки миллии Тоҷикистон, дар баъзе минтақаҳои кӯҳсори кишвар ба маблағи 1 миллиарду 300 миллион сомонӣ қарзҳои хурд дода шудаанд, ки ин нисбат ба ҳамин давраи соли 2013 баробари 27,4 фоиз зиёд аст.