Ҳифзи ёдгориҳои водии Вахон

Хоруғ, 31.12.2014. (АМИТ «Ховар», Файзи Мирҳасан ).- Солҳои охир барои ҳифзи ёдгориҳои водии Вахони ноҳияи Ишкошим таваҷҷӯҳи хоса зоҳир мегардад. Дар ин амр баробари шахсони салоҳиятдор сокинони водӣ низ иштирок менамоянд. Водии Вахонро ба таври ҳаққонӣ осорхонаи табий қаламдод мекунанд. Қалъаҳои қадимӣ, зиёратгоҳҳои аҳли дини дорои таърихи чандинасра имрӯз ҳам диққати на фақат сокинони маҳаллӣ, балки сайёҳони хориҷиро низ ба худ ҷалб мекунанд. Теъдоди сайёҳон дар ин ҷо сол аз сол меафзояд. Қалъаи Ямчун, ки ҳанӯз дар асрҳои дуюм ва сеюми милодӣ бунёд шуда буд, яке аз ёдгориҳои қадимтарини кишвар ба шумор меравад. Имрӯз қалъаи мазкур ба тармиму навсозӣ зарурат дорад. Мазори Шоҳқамбари офтобӣ боз як ёдгории таърихист, ки сокинони маҳаллӣ онро эҳтиёт ва ҳифз менамоянд.Бисёр анъаноти ин диёр аз замони пеш аз исломӣ сарчашма гирифта, биноан диққати шумораи зиёди сайёҳонро ба водии Вахон ҷалб менамоянд.