Ҷаласаи сайёр бо иштироки Махфират Хидирзода

Душанбе, 22.12.2014. (АМИТ «Ховар», Зарангези Латиф).- Дар мақомоти иҷроияи ҳокимияти давлатии вилояти Суғд бо иштироки раиси Кумитаи кор бо занон ва оилаи назди Ҳукумати Ҷумҳурии Тоҷикистон Хидирзода Махфират Умар ҷаласаи сайёр баргузор шуд.
Дар ҷаласаи сайёр муовинони раисони шаҳру ноҳияҳо, мудирони бахшҳои кор бо занон ва оила, маориф, сабти асноди ҳолати шаҳрвандии мақомоти иҷроияи маҳаллӣ ва намояндагони ВАО ширкат варзиданд.
Ба иттилои сомонаи расмии раиси вилояти Суғд, раиси Кумитаи кор бо занон ва оилаи назди Ҳукумати Ҷумҳурии Тоҷикистон Хидирзода Махфират Умар аз баргузории чунин ҷаласаҳои сайёр, ки аз 15-уми декабри соли равон идома дорад, аз мақсаду маром ва ҳадафи асосии он ибрози назар намуд. Аз ҷумла, мавсуф дар бораи дастгирии занон, тақвият бахшидани ҳунарҳои миллӣ, тарбияву таълими ҷавондухтарон, дар сатҳи ҷумҳурӣ бештар комёб гардидани занони ҳунарманди вилоят бо грантҳои Президенти мамлакат, раиси вилоят ва раисони шаҳру ноҳияҳо, ҳамчунин оид ба муаммоҳои ҷомеа андешаҳои худро иброз дошт.