АНМН: Зиёда аз 300 кг маводи нашъаовар сӯзонида шуд

 
Душанбе, 25.12.2014. (АМИТ «Ховар», Муқаддас Темурзода).- Имрӯз, 25 декабри соли 2014 дар оташдони махсуси Агентии назорати маводи нашъаовари назди Президенти Ҷумҳурии Тоҷикистон бо тартиби дар қонунгузорӣ муқарраргардида, маросими сӯзонидани воситаҳои нашъадор баргузор гардид.
Дар ҳузури комиссия аз ҳисоби кормандони мақомоти ҳифзи ҳуқуқ ва судӣ, инчунин бо иштироки намояндагони васоити ахбори оммаи ватанӣ ва хориҷӣ 301 кг 396 гр маводи нашъаовар аз ҷумла: 170 кг 984 гр маводи нашъаовари гурӯҳи каннабис, 122 кг 396 гр афюн; 8 кг 014 гр героин аз рӯи 16 парвандаи ҷиноӣ, ки нисбат ба онҳо ҳукми суд баромадааст, бо роҳи сӯзонидан нобуд карда шуд.
Чорабиниҳо оид ба сӯзонидани маводи нашъаовар аз тарафи кормандони агентӣ мунтазам пас аз баромадани ҳукми суд гузаронида мешаванд.