Азми соҳибкорони шаҳри Чандуи Чин

Душанбе,  12.12.2014. (АМИТ «Ховар», Покизаи  Шодмон).-  Чанде  пеш  раиси  ПСС  Тоҷикистон  Шариф  Саид  бо  гурӯҳи  соҳибкорони  Чин  бо  роҳбарии  муовини  директори  генералии  ширкати  «ВЕРА» — и  Чин   мулоқот  анҷом  дод.  
Тавре  ки  аз  Хадамоти  матбуоти  ПСС  ҶТ   ба  АМИТ «Ховар»  хабар  доданд, мақсад  аз  сафари  ҳайати  ҶМЧ  иборат  аз  намояндагони  ассосиатсияю корхонаҳои   шаҳри  Чандуи  музофоти  Сичуан   омӯхтани   бозори  Тоҷикистон  ва  дарёфти  шарикони  фаъол  барои  фаъолият   дар  бахши   саноати истихроҷи  маъдан,  нафту  газ  ва  кимиё,  ҳамчунин  техникаи   барқӣ,  кишоварзӣ ва   корҳои  пудратӣ   мебошад.
«Ноҳияҳои  ғарбии  Чин,  Тоҷикистон ва   кишварҳои  дигари минтақа байни  худ  равобити  тиҷоратӣ  доранд. Дар  давраҳои  қадим  тоҷирони  Чину кишварҳои  минтақа  маҳсулоти  худро  бо  Роҳи  Абрешим  тавассути  Чини  Ғарбӣ ба  Аврупо  мебурданд»,  —  зикр  намуд  Шариф  Саид. Ба  гуфтаи  мавсуф  Чин  шарики   муҳими стратегии  Тоҷикистон  маҳсуб  меёбад. 
«Дар   бахши  кишоварзӣ  имкониятҳои  зиёди  ҳамкорӣ  мавҷуданд. Пахтакорӣ, боғдорию  токпарварӣ, чорводорӣ  ва ҷамъоварии  асал  феҳрасти  нопурраи   соҳаҳоест, ки   дар  онҳо  метавон  ҳамкории  муфидро  рушду густариш  дод. Соҳибкорони  Чанду  омодаанд, ки  дар  ҳудуди  Тоҷикистон  иктишофоти геологию  минералогиро анҷом дода,  корхонаҳои  муштараки  нассоҷӣ  бунёд  кунанд», —  афзуд  Шариф Саид.