Баландбардории малакаи касбии кормандони АНМН

Душанбе, 30.12.2014 (АМИТ «Ховар», Лайло Тоирӣ).- Кормандони Агентии назорати маводи нашъаовар (АНМН)-и назди Президенти ҶТ мунтазам малакаи касбии худро такмил медиҳанд, дониши амалӣ ва назариявии худро бо назардошти талаботи қонунгузории ҷумҳурӣ мукаммал мегардонанд.
Тавре ки аз хадамоти матбуоти агентӣ хабар доданд, дар Маркази таълимии агентӣ ҳафтаи гузашта семинари омӯзишӣ доир ба баланд бардоштани малакаи касбӣ оид ба масъалаҳои муқовимат ба савдои одамон дар чорчӯбаи Қонуни Ҷумҳурии Тоҷикистон “Дар бораи муқовимат ба савдои одамон ва расонидани кумак ба қурбониёни савдои одамон” аз 26 июли соли 2014 баргузор гардид, ки дар он кормандони агентӣ бо санадҳои байналмилалӣ-ҳуқуқӣ ва санадҳои миллӣ, ки масъалаҳои муқовимат ба савдои одамонро ба танзим медароранд, ҳамкории агентӣ бо мақомоти ваколатдор дар ин самт, инчунин бо асосҳои ҳуқуқии эътироф намудан ва додани мақоми ҳуқуқии қурбониёни савдои одамон ва бозравонии қурбониён барои расонидани кумак шинос шуданд
Дар семинар ба иштирокчиён наворҳо оид ба фаъолияти Комиссияи байниидоравии мубориза бар зидди хариду фурӯши одамон ва наворҳои видеоӣ доир ба масъалаи мазкур намоиш дода шуданд.