Баланси маводи ғизоӣ — олати таҳлили стратегӣ

Душанбе,  04.12.2014. (АМИТ «Ховар»,  Покизаи  Шодмон).-  3  декабр  дар  шаҳри  Душанбе  мулоқот  бо таҳиягарони  маълумоти   омории  баланси  маводи  ғизоӣ ва семинари серӯзаи  таълимии  истифодабарандагони   маълумоти  баланси  маводи  ғизоӣ  баргузор  гардид. 
Назар  ба  хабари  Агентии  омори   назди  Президенти  ҶТ, чорабинии  мазкур  дар  ҳошияи  лоиҳаи «Мусоидат  ба густариши   низоми иттилоотии  миллӣ  оид ба  бехатарии  маводи  ғизоӣ   дар  Тоҷикистон», ки  онро  Иттиҳоди  Аврупо   маблағгузорӣ  ва  Агентии федералии  таҳсилот  дар Тоҷикистон дар  амал  татбиқ  менамояд, роҳандозӣ  шуд. Манзури  лоиҳа  таҳкими  неруи  миллӣ барои таҳияю  таҳлил ва  пешниҳоди  маълумоти   дақиқ  барои   стратегияю  барномаҳо мебошад. 
Иштирокдорони  мулоқот  изҳор  доштанд, ки лоиҳаи  мазкур  бояд  ба  таври  илова  таҳлилу  таҳқиқ ва перомуни   меъёрҳои  хисораи  табиӣ ва  захираҳои   маводи  асосии  ғизоӣ   пешниҳодҳо  ироа  шаванд.
Иштирокдорони  чорабинӣ ҳамчунин  дар  бораи   имконот  ва  маҳдудияти  истифодаи   баланси  маводи  ғизоӣ   табодули  афкор  намуданд.