Баррасии Лоиҳаи зидди маводи нашъаовар аз ҷониби СММ
Душанбе, 3.12.2014. (АМИТ «Ховар», Зарангези Латиф).- Дирӯз дар Хадамоти гумруки назди Ҳукумати Ҷумҳурии Тоҷикистон вохӯрии Намояндагии Созмони Миллали Муттаҳид оид ба маводи нашъаовар ва ҷинояткорӣ дар Тоҷикистон бо муовини сардори хадамот полковник Тоҳирҷон Нуров баргузор гардид.Дар ҷараёни вохӯрӣ мавзӯи тақвият бахшидани мубориза бар зидди гардиши ғайриқонунии маводи нашъадор тавассути гузаргоҳҳои сарҳадӣ мавриди баррасӣ қарор гирифт.Дар вохӯрӣ сафири Япония Камада Такаши, роҳбари намояндагии СММ оид ба маводи нашъаовар ва ҷинояткорӣ дар Тоҷикистон Хоҷиғулом Сарязди, намояндагони Лоиҳаи ХАС/К22, намояндагони расмии мақомоти корҳои дохилӣ ва Агентии мубориза бар зидди гардиши ғайриқонунии маводи нашъадори кишвар иштирок карданд.Аз тарафи Лоиҳаи ХАС/К22 ва намояндагии СММ оид ба маводи нашъаовар ва ҷинояткорӣ дар Тоҷикистон ба се дидбонгоҳи сарҳадии Қарамиқи ноҳияи Ҷиргатол Қизил-арти ноҳияи Мурғоб ва Панҷи поён таҷҳизоти зарурии техникӣ, аз қабили компютер, асбобҳои аксбардорӣ ва наворбардорӣ, ду адад нақлиёти сабукрав ва дигар таҷҳизоти зарурӣ тақдим шуданд.Ёддовар мешавем, ки лоиҳаи ХАС/К22 аз соли 2009 инҷониб фаъолият дошта, барномаҳои худро бо унвони «Мубориза бо гардиши ғайриқонунии маводи нашъаовар, мустаҳкамгардонии гузаргоҳҳои сарҳадӣ ва таъсиси дафтарҳои ҳамкории сарҳадӣ» аз тариқи сарҳади Ҷумҳурии Исломии Афғонистон бо Тоҷикистон ва Ӯзбекистон пиёда месозад.