Боздиди Ш.Саид аз ширкатҳои Италиё

Душанбе,  05.12.2014. (АМИТ «Ховар»,  Покизаи  Шодмон).- Раиси  Палатаи  савдо  ва  саноати  Тоҷикистон  Шариф  Саид   дар  ҷараёни  сафари  кориаш  ба маркази   маъмурии   вилояти  Умбрия  шаҳри Перуҷии Италиё  бо президенти Ассосиатсияи  соҳибкорони  HANDCRAFT ҷаноби  Моретти  мулоқот анҷом  дод. 
Тавре  ки  аз  ПСС ҶТ ба  АМИТ «Ховар»  хабар  доданд, ҷаноби  Моретти  соҳиби  ширкати   косибии  истеҳсолкунандаи  маснуоти  сафолӣ ва маснуоти гуногун  мебошад.
Раиси  ПСС ҶТ  маҳорату  санъати  косибони Италиёро  ба дараҷаи  баланд  арзёбӣ  намуда, гуфт, ки маҳсулоти онҳо ҷузъи  муҳими  мероси фарҳангии  Италиё  маҳсуб  меёбанд. 
Шариф  Саид  ҳамчунин  аз   ширкатҳои   италиёие, ки ба истеҳсоли маҳсулоти бандубасткунӣ  аз  картон  барои  маводи  ғизоӣ   машғуланд,  боздид  намуда, сатҳу  сифати  баланд ва афзалиятҳои  техникии маҳсулоти бандубасткунӣ, зебоӣ ва технологияи муосири онро  қайд  намуд.