Бозии «Истиқлол»-у «Ваҳдат» дар Ҷоми АФК-2015

Душанбе, 12.12.2014. (АМИТ “Ховар”, Ситораи Боймурод).- Дастаи «Истиқлол”-Душанбе, қаҳрамони имсолаи Тоҷикистон ва барандаи Ҷоми кишвар бар асоси қуръакашӣ, ки дирӯз дар қароргоҳи АФК (Конфедератсияи футболи Осиё) дар пойтахти Малайзия — Куала-Лумпур, баргузор гардид, дар Ҷоми АФК-2015 дар гурӯҳи «С” бо тимҳои «Ал-Қудсия”-и Кувайт, барандаи феълии Ҷоми АФК, «Эрбил”-и Ироқ, финалисти мусобиқаи охирини Ҷоми АФК ва ғолиби плей-офф (Уммон, Туркманистон ва Қирғизистон) рақобат хоҳад кард. 
Тавре ки дар ин бора Кумитаи миллии олимпии кишвар хабар додааст, дар қуръакашии Ҷоми АФК-2015 намояндагони 41 даста, ки 23 федератсияи миллиро намояндагӣ карданд, ширкат доштанд. Бозиҳои даври гурӯҳӣ аз 24-уми феврал то 13-уми май соли 2015 баргузор мешаванд.
Гуфта мешавад, ки дар Ҷоми АФК-2015 Тоҷикистонро ба ҷуз  «Истиқлол» дастаи «Хайр»-и Ваҳдат, барандаи медалҳои нуқраи мусобиқаи қаҳрамонии Тоҷикистон намояндагӣ мекунанд.
Дар даври интихобӣ рақиби «Хайр» қаҳрамони Бангладеш — бошгоҳи «Шайх Рассел» — мебошад. Ин бозӣ 10-уми феврали соли оянда дар Варзишгоҳи марказии шаҳри Душанбе баргузор мешавад. Дар мавриди пирӯзӣ ”Хайр” дар даври севум ва ҳалкунандаи интихобӣ 17-уми феврал дар сафар бо барандаи Ҷоми Лубнон-2014 — бошгоҳи «Салом Ҷҳарта»- рақобат хоҳад кард.