Бозии тими мунтахаби Тоҷикистон дар гурӯҳи “D”

Душанбе, 16.12.2014. (АМИТ “Ховар”, Ситораи Боймурод).- Тақвими бозиҳои даври интихобии мусобиқаи қаҳрамонии Осиё-2016 дар гурӯҳи «D» тасдиқ шуд. Мунтахаби Тоҷикистон дар гурӯҳи “D” 27-уми март бо тими мунтахаби ҷавонони Яман, 29-март бо дастаи Имороти Муттаҳидаи Араб ва 31-уми март бо тими Шри-Ланка рақобат мекунад. Бозиҳои сабқати интихобӣ дар ин гурӯҳ аз 27-ум то 31-уми марти соли оянда баргузор мегардад. Вале макони баргузории сабқати гурӯҳи «D” то ҳоло маълум нашудааст. Тавре ки дар ин бора Кумитаи миллии олимпӣ хабар додааст, дар марҳилаи интихобӣ 43 даста ширкат меварзад. Ба минтақаи шарқӣ 20 даста шомил аст. Бояд гуфт, ки мусобиқаи қаҳрамонии Осиё-2016 байни ҷавонон мусобиқаи интихобӣ барои роҳ ёфтан ба Бозиҳои олимпии соли 2016, ки дар Рио-де-Жанейрои Бразилия баргузор мешавад, маҳсуб меёбад. Ҷоизадорони бозиҳои қаҳрамонии ҷавонони Осиё ба Олимпиадаи соли 2016 роҳхат мегиранд.