Бунёди иншоот дар Кӯлоб

Кӯлоб, 11.12.2014 (АМИТ  «Ховар», Сулаймони  Хол).- Дар шаҳру ноҳияҳои минтақаи Кӯлоб бо маблағгузории ҳокимияти давлатӣ ва ҷалби соҳибкорон як силсила иншооти ниёзи мардум ба истифода дода шуд.
Беморхонаи ноҳиявии рақами 1 дар ҷамоати деҳоти Зарбдор солҳои тӯлонӣ дар фасли зимистон аз сабаби сард будани ҳуҷраҳо ва утоқҳои кории табибон ба мушкилӣ рӯ ба рӯ  буд ва инак ин беморхона бо маркази мустақими гармидиҳӣ таъмин шуд.
Корҳои сохтмониро ҶДММ «Суғдиён»-и шаҳри Кӯлоб дар муҳлати кӯтоҳ ва бо сифати баланд ба анҷом расонид. Дар маҳаллаи Умари Хайём нарасидани оби нӯшокӣ мушкили асосии сокинон ба ҳисоб мерафт ва бо маблағузории ҳукумати шаҳри Кӯлоб корхонаи обу корез тавонист беш аз 120 оиларо бо оби нӯшокӣ таъмин намояд. 
Гуфта мешавад дар маркази шаҳр бо дастгирии мақомоти иҷроияи ҳокимияти давлатӣ соҳибкорони маҳаллӣ маркази савдоро мавриди истифода қарор доданд, ки минбаъд сокинону меҳмонон имкон доранд аз ин марказ қисмҳои эҳтиётии мошинҳо ва маводи хӯрокӣ харидорӣ намоянд.