Чорабинии тарбиявию маърифатӣ дар ДДХ

Душанбе, 19.12.2014. (АМИТ «Ховар», Раъно Нусратуллозода).- Дирӯз дар Донишгоҳи давлатии Хуҷанд ба номи академик Б.Ғафуров бо иштироки васеи устодону донишҷӯён ва намояндагони мақомоти иҷроияи ҳокимияти давлатии вилояти Суғд ва Шӯрои уламои дини вилоят чорабинии тарбиявию маърифатӣ доир гардид.
Тавре ки аз Маркази иттилооти донишкада иттилоъ доданд, дар чорабинӣ дар бораи тарбияи худшиносии миллӣ, ифтихори ватандорӣ, шаъну шарафи шаҳрвандии хонандагону донишҷӯён, пешгирии зуҳуроти бегонашавӣ ва бегонапарастӣ, гаравиш ба ташкилоту созмонҳои ифротгаро ва ташкилкунандаи таассуби динӣ сухан рафт.
 Зикр шуд, ки Раёсати донишгоҳ бо ҷалби олимони ҷомеашинос ва коршиноси факулта ва кафедраҳои илмҳои ҷамъиятшиносӣ, олимон ва муҳаққиқони пажӯҳишгоҳҳои илмӣ-таҳқиқотӣ оид ба пайдоиши зуҳуроти бегонашавӣ ба бегонапарастӣ дар байни ҷавонон, оқибатҳои гаравиш ба ташкилоту созмонҳои ифротгаро ва таъсири хатарноки онҳо ба ҷаҳонбинии донишҷӯёну омӯзгорон гурӯҳҳои таҳлилӣ- иттилоотӣ таъсис додааст, то пеши роҳи ин зуҳуроти номатлуб гирифта шавад.