Даъвати охирин иҷлосияи ММ МО ҶТ дар Душанбе

             Душанбе, 9.12.2014.(АМИТ «Ховар», Марзия Саидзода).- 24 декабри соли равон дар шаҳри Душанбе иҷлосияи бистуми Маҷлиси миллии Маҷлиси Олии Ҷумҳурии Тоҷикистон даъвати чорум баргузор мегардад. Дар ин хусус раиси Маҷлиси миллии Маҷлиси Олии  ҷумҳурӣ Маҳмадсаид Убайдуллоев қарор ба имзо расонд.
    Аз палатаи болоӣ ба АМИТ «Ховар» иттилоъ доданд, ки дар иҷлосияи бистуми Маҷлиси миллӣ қонунҳои Ҷумҳурии Тоҷикистон «Дар бораи  маҷлисҳо, гирдиҳамоиҳо, намоишҳо ва роҳпаймоиҳо», «Дар бораи назорати содирот», «Дар бораи ворид намудани тағйирот  ба Кодекси мурофиавии граждании Ҷумҳурии Тоҷикистон», «Дар бораи низоми иҷозатдиҳӣ», «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи берун баровардан ва дохил кардани сарватҳои фарҳангӣ» ва соири масоили марбут ба рушди ҳаёти сиёсию иқтисодӣ ва иҷтимоию фарҳангии кишвар матраҳ ва ҷонибдорӣ мешаванд.
     Бояд тазаккур дод, ки иҷлосияи бистуми Маҷлиси миллӣ охирин иҷлосия дар соли 2014 ва дар даъвати чорум ба шумор меравад.
      Тибқи Фармони Президенти  кишвар Эмомалӣ  Раҳмон   27 марти соли 2015  дар ҷумҳурӣ интихоботи аъзои нави Маҷлиси миллии Маҷлиси Олии Ҷумҳурии Тоҷикистон баргузор мегардад.