Даври 23-юми Ҷоми Иттиҳод дар Русия

Душанбе, 19.12.2014. (АМИТ “Ховар”, Ситораи Боймурод).- Дастаи мунтахаби ҷавонони футболи Тоҷикистон бар асоси қуръакашии мусобиқаи XXIII байналмилалии Ҷоми Иттиҳод-2015, ки дирӯз дар Хонаи футболи Русия баргузор гардид, дар гурӯҳи “С” бо дастаҳои Африқои Ҷанубӣ, Литва ва Қазоқистон рақобат хоҳад кард. 
Тавре ки дар ин бора Кумитаи миллии олимпии кишвар хабар додааст, мусобиқа аз 16-ум то 25-уми январи соли 2015 бо ширкати 12 даста, ки ба се гурӯҳ тақсим шудаанд, дар Маҷмааи варзишию фарҳангии «Петербургский»-и шаҳри Санкт-Петербурги Русия баргузор мешавад.
Ба ҳайати дастаҳои ширкаткунандаи ин мусобиқа футболбозони соли таваллудашон 1994 ва аз он хурд дохил мешаванд.
Дар Ҷоми Иттиҳод, ки барои бори 23-юм барпо мегардад, ба ҷуз 10 дастаи мунтахаби кишварҳои собиқи шӯравӣ, инчунин дастаҳои ҷавонони Финляндия ва Африқои Ҷанубӣ ширкат хоҳанд кард. Вале мунтахаби ҷавонони Украина, ғолиби мусобиқаи порсола ширкат намеварзад.