Дуюмин медали варзишгарони тоҷик дар Ҷоми ҷаҳонии самбо

Душанбе, 9.12.2014. (АМИТ “Ховар”, Ситораи Боймурод).- Варзишгари тоҷик Каюмарс Норов дар Ҷоми ҷаҳонии самбо байни донишҷӯён, ки дирӯз, 8-уми декабр дар шаҳри Лимассоли Кипр хотима ёфт, дар рақобатҳо дар вазни 52 килограмм медали биринҷӣ ба даст овард. 
Бояд гуфт, ки ин дувумин медали варзишгарони тоҷик дар Ҷоми ҷаҳонии самбо байни донишҷӯён дар Лимассол ба шумор меравад. Нахуст Ардашер Исмоилов, варзишгари тоҷик, рӯзи 7-уми декабр дар рақобатҳо дар вазни 57 килограмм барои ҷойи севум бо медали биринҷӣ мукофотонида шуд.
Тавре ки дар ин бора сомонаи Кумитаи миллии олимпии кишвар хабар додааст, дар Ҷоми ҷаҳонии самбо байни донишҷӯён, ки дар Лимассоли Кипр рӯзҳои 7-8-уми декабр баргузор гардид, 100 варзишгар аз  22 кишвар ширкат дошт. Тоҷикистонро ба ҷуз Ардашер Исмоилов ва Каюмарс Норов, инчунин Суруш Каримов (74 кг), Рашид Зиёбеков (82 кг) ва Хуршед Маҷидов (100 кг) намояндагӣ карданд.
Ёдовар мешавем, ки варзишгарони тоҷик, инчунин дар  мусобиқаи қаҳрамонии самбои ҷаҳон миёни наврасони  14-16-сола, ки рӯзҳои 5-6-уми декабр дар шаҳри Лимассоли Кипр баргузор шуд, 4 медал (2 нуқра ва 2 биринҷӣ) ба даст оварданд.